ໃນຕອນເຊົ້າ ເວລາ 08:00 ໂມງ ຂອງວັນທີ 02 ກຸມພາ 2020 ຢູ່ທີ່ຫ້ອງປະຊຸມໃຫຍ່ຂອງພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ບໍລິຄຳໄຊ ໄດ້ຈັດຕັ້ງກອງປະຊຸມ ແລກປ່ຽນ, ຖອດຖອນບົດຮຽນພາຍໃນຂົງເຂດຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ປະຈຳປີ 2020 ແລະ ທິດທາງແຜນການ ປີ 2021- 2025 ຂື້ນ ພາຍໃຕ້ການເປັນປະທານຂອງທ່ານ ສົມສະຫງວນ ສຸວັນນະລາດ ຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ເຊິ່ງກອງປະຊຸມຄັ້ງນີ້ມີຫົວໜ້າພະແນກ ແລະ ຄະນະພະແນກ, ຫົວໜ້າຫ້ອງການ ຊສ 07 ຕົວເມືອງ, ຫົວໜ້າຂະແໜງ-ຮອງຂະແໜງ, ພ້ອມດ້ວຍພະນັກງານວິຊາການ ເຂົ້າຮ່ວມມີຈໍານວນທັງໝົດ 56 ທ່ານ, ຍິງ 15 ທ່ານຢ່າງພ້ອມພຽງ.
ກອງປະຊຸມໄດ້ຮັບຟັງການລາຍງານ ກ່ຽວກັບ ຮ່າງບົດສະຫຼຸບ ຮອບດ້ານປະຈໍາປີ 2020 ແລະ ຜ່ານທິດທາງແຜນການປະຈຳປີ2021 ສະເພາະຢູ່ພາຍໃນຂົງເຂດວຽກງານ ຊັບພະຍາກອນທຳມະຊາດ ແລະ ສິ່ງແວດລ້ອມແຂວງຈາກທ່ານ ອຸທອນ ສິງຫາດວງປັນຍາ ຮອງຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ.ພ້ອມໄດ້ຮັບຟັງການລາຍງານກ່ຽວກັບ ຂັ້ນຕອນໃນການດໍາເນີນວຽກງານປະຕູດຽວຂອງແຂວງ ແລະ ການກະກຽມສ້າງຕັ້ງໜ່ວຍງານອອກໃບຕາດິນຂັ້ນເມືອງ ( ເມືອງທ່າພະບາດ ແລະ ເມືອງຄໍາເກີດ ) ການລາຍງານຈາກ ບັນດາຫົວໜ້າຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງທັງ 07 ເມືອງ ຂື້ນມາຜ່ານບົດລາຍງານຫຍໍ້ ຂອງການຈັດຕັ້ງປະຕິບັດວຽກງານ ໃນຂົງເຂດຄວາມຮັບຜິດຊອບຂອງຕົນ ໂດຍຍົກໃຫ້ເຫັນບັນຫາທີ່ພົ້ນເດັ່ນຕ່າງໆ ມາດຕາການ ແລະ ວິທີແກ້ໄຂ.
ຫົວໜ້າພະແນກ ພ້ອມດ້ວຍຄະນະພະແນກ, ມີບັນດາຫົວໜ້າຫ້ອງການຊັບທັງ 7 ຕົວເມືອງ ແລະ ບັນດາຫົວໜ້າຂະ ແໜງ ໄດ້ປະກອບຄໍາຄິດເຫັນໃສ່ ເພື່ອເຮັດໃຫ້ຮ່າງບົດສະຫຼຸບປະຈໍາປີສົມບູນຍິງຂື້ນ ໄດ້ມອບ - ຮັບໃບຍ້ອງຍໍ, ໃບຊົມເຊີຍ ຂັ້ນຕ່າງໆ ເຊັ່ນ: ຂັ້ນກະຊວງ, ຂັ້ນແຂວງ, ຂັ້ນພະແນກ ໃຫ້ແກ່ພະນັກງານ ພະແນກຊັບພະຍາກອນທໍາມະຊາດ ແລະ ສິ່ງແວດແຂວງ ແລະ ບັນດາພະນັກງານຫ້ອງການຊັບພະຍາກອນທໍາ ແລະ ສິ່ງແວດລ້ອມທັງ 7 ເມືອງ. ແລະ ເພື່ອແລກປ່ຽນ, ຖອດຖອນບົດຮຽນພາຍໃນຂົງເຂດຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ປະຈຳປີ 2020 ແລະ ທິດທາງແຜນການ ປີ 2021- 2025; ສຸມໃສ່ປຶກສາຫາລືບັນຫາທີ່ພົ້ນເດັ່ນ ກ່ຽວກັບວຽກງານທີ່ດິນ, ວຽກງານສິ່ງແວດລ້ອມ, ວຽກງານການຄຸ້ມຄອງ ຊັບພະຍາກອນນໍ້າ ແລະ ອຸຕຸນິຍົມ-ອຸທົກກະສາດ, ແຜນການ-ການເງິນ, ວຽກການຈັດຕັ້ງ, ກວດກາ ແລະ ບັນຫາອື່ນໆ, ພ້ອມັ້ນຍັງປຶກສາຫາລືຄົ້ນຄວ້າຈັດຕັ້ງຜັນຂະຫຍາຍແຜນປະຈຳປີ 2021 ພ້ອມທັງວາງວິທີການ, ມາດຕະການຕ່າງໆ, ໜ້າທີ່ ໆເໝາະສົມ ເພື່ອເຮັດໜ້າທີ່ຄຸ້ມຄອງປົກປັກຮັກສາ ຟື້ນຟູບູລະນະຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ບັນລຸການພັດທະນາແບບຍືນຍົງ ສ້າງຄວາມເຂັ້ມແຂງການພັດທະນາຕາມທິດສີຂຽວ ແລະ ຍືນຍົງຂອງແຂວງວາງອອກເທື່ອລະກ້າວ.
